خلیجی بادشاہتوں پر اسرائیلی اثر اور بحرین میں شیعہ علماء کے خلاف کریک ڈاؤن
تحریر: ح۔ا۔ ڈاکٹر سید شفقت حسین شیرازی
خلیجِ فارس کی عرب ریاستوں میں اقتدار کی منتقلی، اسرائیل اور امریکہ پر ان کا انحصار اور بحرین میں علماء کے خلاف حالیہ عدالتی فیصلے، یہ سب ایک ہی سلسلے کی کڑیاں ہیں۔ بحرین میں علماء کو سنائی جانے والی سزائیں کوئی الگ واقعہ نہیں، بلکہ برسوں سے جاری پالیسی کا تسلسل ہیں۔
برطانوی انخلاء اور خاندانی حکمرانی کی بنیاد
جب برطانیہ خلیجی خطے سے واپس جانے لگا تو اس نے مختلف ریاستیں مخصوص خاندانوں کے سپرد کر دیں۔ کویت میں آلِ صباح، بحرین میں آلِ خلیفہ اور سعودی عرب میں آلِ سعود کی حکومت قائم ہوئی۔ عمان اور قطر سمیت باقی خلیجی ممالک میں بھی اقتدار ایک ہی خاندان کے حوالے کیا گیا۔
یوں ملوکیت پر مبنی ایک نظام متعارف ہوا۔ اقتدار ان خاندانوں کو اس لیے سونپا گیا کہ وہ آگے چل کر استعماری مفادات کے محافظ ہوں گے اور استعمار کو ان پر اعتماد تھا۔
اقتدار کی منتقلی کا مرحلہ
سعودی عرب: ابتدا میں اقتدار ایک بھائی سے دوسرے بھائی کو منتقل ہوتا رہا۔ ملک خالد کے بعد ملک فیصل، ان کے بعد ملک فہد اور پھر ملک عبداللہ آئے۔ یہ سلسلہ موجودہ بادشاہ ملک سلمان تک چلا، اور ان تمام حکمرانوں کا آپس میں بھائی ہونا اس کی نمایاں خصوصیت رہی۔ اس کے بعد اقتدار اگلی نسل کو منتقل ہونے کا مرحلہ آتا ہے۔
کویت: یہاں بھی یہی صورت رہی۔ آلِ صباح کے ساتویں فرزند شیخ مشعل الاحمد الجابر الصباح دسمبر 2023 میں اپنے بڑے بھائی کے انتقال کے بعد حاکم بنے۔
امارات: محمد بن زاید سے پہلے اقتدار بھائیوں کے درمیان ہی رہا۔ محمد بن زاید نے اپنے تمام بھائیوں کو راضی کر کے اپنے بیٹے کو ولی عہد بنا دیا ہے۔
بحرین: صرف بحرین میں اقتدار طویل عرصے سے باپ سے بیٹے کو منتقل ہو رہا ہے۔
کویت میں اگلا مرحلہ: شیخ مشعل کو ابھی اپنا اقتدار اپنے بیٹوں میں منتقل کرنا ہے اور وہ اسی مرحلے سے گزر رہے ہیں۔ اسی لیے آج کویت اسرائیل کے سب سے زیادہ قریب نظر آتا ہے۔ بحرین تو پہلے ہی اسرائیل کی گود میں جا چکا ہے۔
اقتدار کی بقا اور اسرائیل پر انحصار
انتقالِ اقتدار کے اس مرحلے میں ہر حاکم کو امریکہ اور صہیونیوں کی حمایت درکار تھی، کیونکہ یہ تمام ریاستیں امریکی بلاک کا حصہ تھیں۔ خود ٹرمپ کے بقول ان کی حکومتیں امریکی حمایت کے بغیر ایک ہفتہ بھی نہیں چل سکتیں۔ اگر امریکہ ان کی حفاظت نہ کرے تو ان کا اقتدار باقی نہیں رہ سکتا۔
امریکہ اور برطانیہ کے لیے خطے میں قابلِ اعتماد ریاست اسرائیل ہے، جسے برطانوی ایماء پر قائم کیا گیا۔ ان کی کلی سیاست یہ ہے کہ خطے پر اسرائیل کی بالادستی ہمیشہ برقرار رہے۔ جب تک صہیونی اور اسرائیلی راضی نہ ہوں، ان بادشاہوں کے لیے اقتدار کو مستقبل کے مطلوبہ نظام کی طرف منتقل کرنا ناممکن ہوتا ہے۔
اسرائیل کی شرائط اور خلیجی ریاستوں کی افادیت
اسرائیل بادشاہوں کی اس کمزوری سے فائدہ اٹھا کر اپنی تمام شرائط منواتا ہے، ان سے تعلقات قائم کرتا ہے اور انہیں اپنا تابع بناتا ہے۔ دوسری طرف امریکہ اور اسرائیل کو بھی خطے کے سیاسی تنازعات میں خلیجی ممالک کی مدد درکار رہتی ہے، چاہے وہ مسئلۂ فلسطین ہو، لبنان، شام یا مصر کے ساتھ تعلقات، یا خطے کا کوئی اور مسئلہ۔ یہ مدد دو صورتوں میں سامنے آتی ہے:
مالی معاونت: امریکی اور اسرائیلی جنگوں میں خلیجی ریاستوں سے پیسہ لیا جاتا ہے۔
سیاسی نفوذ: سرد جنگ کے دنوں سے عالمِ عرب اور مسلم ممالک میں خلیجیوں کا اثر و رسوخ رہا ہے۔ اس کے ذریعے حکومتوں کے معاملات میں مداخلت کی جا سکتی ہے، دباؤ بڑھایا جا سکتا ہے اور داخلی صورتحال کو اپنے حق میں موڑا جا سکتا ہے۔
چھوٹی ریاستیں اور بڑے سرپرست کی ضرورت
بعض خلیجی ریاستیں ذاتی طور پر کمزور اور چھوٹی ہیں، اس لیے انہیں کسی بڑے سپورٹر کی ضرورت رہتی ہے۔ بحرین سب سے چھوٹا ملک ہے اور اس کی کل آبادی تقریباً ڈیڑھ ملین ہے۔ کویت بھی چھوٹا ملک ہے۔
بحرین کی تقریباً 80 فیصد یا اس سے زیادہ آبادی شیعہ ہے۔ کویت میں بھی تقریباً 35 فیصد سے زائد شیعہ آبادی موجود ہے۔
شیعہ مکتب کے خلاف امریکی و اسرائیلی پالیسی
امریکہ اپنی سیاست کے لیے شیعہ مذہب، اس کے پیروکاروں اور علماء کو اپنے لیے خطرہ سمجھتا ہے۔ دو تین دن پہلے امریکی وزیرِ خارجہ مارکو روبیو کا ایک بیان آیا، جس میں کہا گیا کہ خطے میں امریکہ کا سب سے بڑا مسئلہ ایران کے شیعہ علماء ہیں، یا وہ شیعہ مذہب ہے جو امریکی تسلط کے سامنے رکاوٹ بنا ہوا ہے۔
خاص طور پر وہ لوگ اس خطرے کی زد میں ہیں جو انقلابِ اسلامی ایران کے بعد فکرِ امام خمینیؒ سے متاثر ہیں اور سیاسی اسلام پر ایمان رکھتے ہیں۔ یہ لوگ کربلا کے پیغام یعنی عزت، کرامت اور شرف کے قائل ہیں اور ظالم کے سامنے نہ جھکنے کی پالیسی پر کاربند ہیں۔ وہ امریکی اور صہیونی تسلط اور ناجائز زیادتیوں کو قبول نہیں کرتے، اسی لیے ان کے لیے خطرہ بنے ہوئے ہیں۔
حقیقت یہ ہے کہ امریکہ اور اسرائیل کی جنگ صرف ایران کے خلاف نہیں، بلکہ پورے عالمِ تشیع اور مکتبِ اہلِ بیت کے خلاف کھلی جنگ ہے۔ اس پالیسی کا مقصد یہ ہے کہ:
مذہبِ اہلِ بیتؑ کے پیروکاروں کو جتنا ممکن ہو کمزور کیا جائے؛
ان کے نفوذ، طاقت اور اثر و رسوخ کو کم کیا جائے؛
ان کے عناصرِ قوت کو ختم کیا جائے۔
امریکہ اور اسرائیل اس کا بار بار اظہار بھی کرتے رہے ہیں۔
شیعہ سنی تفریق اور سلفی و وہابی فکر کی تقویت
دوسری طرف شیعہ سنی فتنہ ابھارنے کے لیے سنی مذہب کو آلۂ کار بنانے کی کوشش کی جاتی ہے۔ خاص طور پر سلفیت اور وہابیت کو شیعہ کے مقابلے میں مضبوط کیا جاتا ہے۔ یہ امریکہ اور اسرائیل کی سٹریٹجک پالیسی ہے جس پر وہ عمل پیرا ہیں۔
بحرین میں آبادی کا تناسب بدلنے کی کوشش
بحرین میں شیعہ آبادی کی بڑی تعداد کے پیشِ نظر کوشش یہ ہے کہ شیعہ تعداد اور تناسب کم کیا جائے، انہیں ہجرت پر مجبور کیا جائے اور ان پر عرصۂ حیات تنگ کیا جائے۔ اس کے مقابلے میں دنیا کے مختلف ممالک سے وہابی اور سلفی فکر رکھنے والے اہلِ سنت کو لا کر بحرین میں بسایا جا رہا ہے۔ یہ سلسلہ گزشتہ کئی دہائیوں سے جاری ہے۔
آج بحرین میں جو کچھ ہو رہا ہے، وہ اسی پالیسی کا حصہ ہے۔ وہاں ہر وہ شخصیت، گروہ یا طبقہ جو اپنے حقوق کی بات کرتا ہے، حکومت کی نظر میں دشمن شمار ہوتا ہے۔
آیت اللہ عیسیٰ قاسم: ایک تعارف
بحرین کی نمایاں ترین شخصیات میں مجتہد کے درجے کے عالم آیت اللہ عیسیٰ قاسم شامل ہیں، جو اقتدار کو بالکل نہیں بھاتے۔ حالانکہ تاریخی طور پر ان کا کردار بہت اہم رہا ہے۔
پارلیمان اور دستور میں کردار: ملک کے استقلال کے وقت 1972 میں بادشاہت کے زیرِ اثر پارلیمانی نظام قائم ہوا اور دستور لکھنے کی بات ہوئی۔ آیت اللہ عیسیٰ قاسم ان انتخابات میں کامیاب ہو کر اس پارلیمان کے رکن بنے۔ وہ ایک پڑھی لکھی اور فاضل شخصیت تھے اور دستور کی تحریر میں بھی ان کا کردار رہا۔ بحرین کے قانون کی کئی شقیں ان کی تحریر کردہ ہیں۔ یہی دستور اس وقت تک چلتا رہا جب تک حکمران خاندان نے پارلیمان کو معطل نہیں کر دیا۔
علمی پس منظر: آیت اللہ عیسیٰ قاسم شہید باقر الصدرؒ کے شاگرد ہیں۔ انہوں نے ایران میں بھی تدریس کی اور تحصیلِ علم کا سلسلہ جاری رکھا۔ وہ فقیہ اور عالم ہیں اور ان کا بڑا مقام ہے۔
وطن واپسی: 2001 میں وطن واپس آ کر انہوں نے نمازِ جمعہ قائم کی اور اپنی سرگرمیوں کا آغاز کیا۔ ملک سے باہر رہتے ہوئے بھی ملکی معاملات میں ان کا کردار رہا تھا۔ 2004 میں انہوں نے “مجلس الاسلامی العلمائی” تشکیل دی۔
عرب اسلامی بیداری، میدانِ لؤلؤہ اور ریاستی سختی
ابتدا میں آیت اللہ عیسیٰ قاسم کی مقبولیت حکومت کو ناگوار تھی، مگر اس نے ان کے خلاف کوئی اقدام نہیں کیا۔ صورتحال 2011 کے بعد بدلی، جب پورے خطے میں عرب بہار اور بیداریٔ اسلامی کی لہر اٹھی۔ بحرین کے عوام بھی آزادی، خودمختاری اور منصفانہ نظام چاہتے تھے اور ظالمانہ اقدامات پر ان کے شدید تحفظات تھے۔ لوگ میدانِ لؤلؤہ میں نکلے اور تحریک کو نئی قوت ملی۔
جواب میں حکومت نے کئی علماء اور عام لوگوں کے خلاف سخت اقدامات کیے۔ 2016 سے آیت اللہ عیسیٰ قاسم کے خلاف دائرہ تنگ کیا گیا۔ 2017 میں عدالتی فیصلے کے ذریعے ان کی شہریت سلب کر کے انہیں ملک بدر کر دیا گیا اور وہ بیرونِ ملک چلے گئے۔
شیعہ رموز اور بڑی علمی شخصیات کے خلاف حالیہ فیصلے کوئی نئی بات نہیں، بلکہ اسی سلسلے کا تسلسل ہیں جو حکمرانوں نے مدت سے شروع کر رکھا ہے۔ اس سے پہلے بھی کئی لوگوں کے خلاف ایسے ظالمانہ فیصلے ہوئے۔ آج بھی سینکڑوں لوگ جیلوں میں ہیں، اور ان کا قصور یہ ہے کہ انہوں نے مظاہروں میں شرکت کی، صحافت یا میڈیا میں کلمۂ حق بلند کیا یا اپنے حقوق کی بات کی۔ کئی افراد جیلوں میں اذیت کے باعث دنیا سے جا چکے، یعنی شہید ہو چکے ہیں۔ وہاں کا نظام پوری طاقت کے ساتھ اس عوامی تحریک کو کچلنے کی کوشش کر رہا ہے۔
شیعہ مذہبی و ثقافتی آزادیوں پر پابندیاں
بحرین میں شیعہ پیروکاروں پر حکومت کی طرف سے دباؤ کے بہت سے حربے استعمال کیے گئے:
اوقافِ جعفریہ: رسمی ادارہ “اوقافِ جعفریہ” حکومت نے ختم کر دیا۔
ثقافتی جمعیت: ایک رسمی حیثیت کی حامل “جمعیۂ ثقافیہ” بھی ختم کر دی گئی، جس کے ذریعے ثقافتی و فرہنگی سرگرمیاں ہوتی تھیں۔
لاؤڈ سپیکر: اس کے استعمال کے بارے میں قانون سازی کر کے اس پر مکمل پابندی لگا دی گئی۔
مجالسِ عزا: شیعہ اکثریتی ملک ہونے کے باوجود عاشورہ اور مجالس پر پابندی لگائی گئی۔ حکم دیا گیا کہ کوئی مجلس یا عزاداری کا جلوس باہر نہیں نکلے گا اور کوئی مجلسِ عام منعقد نہیں ہو گی۔
زائرین: مقاماتِ مقدسہ کی زیارت کے لیے عراق اور ایران جانے والوں پر پابندیاں لگائی گئیں۔
خطبۂ جمعہ اور خطابت: حکومت سے اجازت نامہ (پرمٹ) لیے بغیر خطبہ پڑھنے کی ممانعت کر دی گئی، اور خطباء کے لیے نئی پالیسیاں بنائی گئیں۔
نصابِ تعلیم: قرآن کی وہ آیات اور مضامین نصاب سے نکال دیے گئے جو بنی اسرائیل اور یہودیوں کی کارستانیوں کی مذمت سے متعلق تھے، یعنی ہر وہ چیز جس سے امریکہ اور اسرائیل ناخوش تھے۔ اس میں عوام کے عقیدے اور جذبات کا کوئی خیال نہیں رکھا گیا۔
اسرائیل سے تعلقات اور عوامی غیظ و غضب
حکومت نے اسرائیل کے ساتھ سفارتی تعلقات قائم کر کے اسے باقاعدہ تسلیم کر لیا۔ اس کے بعد یہودیوں کی کھلم کھلا آمد و رفت اور ان کی تقریبات اور پروگرام شروع ہو گئے۔ ملک کی سلامتی و امنیت موساد کے ہاتھ میں جا چکی ہے اور جو پالیسیاں اسرائیل چاہتا تھا، وہ نافذ کی جا رہی تھیں۔ اس سے عوام میں شدید غصہ اور غیظ و غضب پیدا ہوا۔
مئی 2026: گرفتاریوں کی لہر
حالیہ واقعات کی ابتدا مئی 2026 میں ہوئی، جب حکومت اور اس کے نظام نے دعویٰ کیا کہ آیت اللہ عیسیٰ قاسم نے ایک تنظیم بنائی ہے جس کا ایران سے تعلق ہے۔ اس الزام کی بنیاد پر 9 مئی 2026 کے بعد بڑے پیمانے پر کریک ڈاؤن کیا گیا اور بڑی تعداد میں لوگوں کو گرفتار کیا گیا۔ گرفتار ہونے والوں میں شامل تھے:
بہت سے بزرگ علماء؛
مراجعِ عظام اور آیت اللہ سیستانی کے وکلاء سمیت دیگر وکلاء؛
حوزاتِ علمیہ کے مدرسین؛
نوحہ خوان اور بحرین کی دیگر معروف شیعہ شخصیات۔
حکومت نے دعویٰ کیا کہ اس تنظیم کا نام “تنظیمِ ولایتِ فقیہ” ہے اور اس کے 69 افراد ہیں۔ ان میں 40 علمائے دین، 11 بیرونِ ملک رہنے والے علماء جو ان سے رابطے میں رہتے ہیں، اور 17 عام دانشور، پڑھے لکھے افراد اور طلبہ بتائے گئے۔ یہ سب حکومت کا اپنا گھڑا ہوا بیانیہ ہے، جو اسی پرانی پالیسی کا حصہ ہے۔
ایران کے ساتھ مذاکرات کے لیے دباؤ کا حربہ
حقیقت میں حکومت کی پالیسی یہ تھی کہ ہر وہ شخص جو شیعہ ہے، مؤثر ہے یا جس کا اجتماعی مقام ہے، اسے گرفتار کیا جائے۔ ان کا حساب یہ ہے کہ اگر جاری جنگ کے بعد ایران کے ساتھ مذاکرات کرنے پڑے تو ان کے ہاتھ میں دباؤ کے مختلف کارڈ موجود ہوں گے۔ جن لوگوں کو گرفتار کیا گیا یا جن کے خلاف فیصلے سنائے جا رہے ہیں، ان کے بدلے وہ ایران سے آئندہ مختلف رعایتیں لیں گے۔ وہ سمجھتے ہیں کہ جنگ ختم ہونے کے بعد بھی ان معاملات کو معلق رکھا جائے، تاکہ مؤثر شخصیات آزاد نہ ہوں اور ایران پر دباؤ برقرار رہے۔ اس کے پیچھے وہی صہیونی اور یہودی سوچ کارفرما ہے۔
عدالتی کارروائی اور فیصلوں کا تسلسل
8 نومبر (اتوار): پہلے اعلان کیا گیا کہ اس دن عدالت میں مقدمے کی کارروائی ہو گی اور فیصلہ سنایا جائے گا۔ مگر اس روز بڑی تعداد میں لوگ مظاہروں کے لیے سڑکوں پر نکل آئے۔ اس دباؤ کو دیکھ کر حکومت نے اعلان کیا کہ فیصلہ 22 نومبر کو سنایا جائے گا۔
3 نومبر: ایران کی طرف سے بحرین میں موجود امریکہ کے سب سے بڑے ریڈار سسٹم کو تباہ کیا گیا اور امریکی مفادات کو نقصان پہنچایا گیا۔ یہ حملے شیخ عیسیٰ ایئر بیس کے قریب ہوئے، جو فضائیہ کا بہت بڑا فوجی اڈا ہے اور بادشاہ کے شاہی ایئرپورٹ اور شاہی محل کے قریب واقع ہے۔
حملوں کے بعد: بادشاہ اس وقت جدہ میں ایک کانفرنس میں تھا۔ وہاں سے وہ ریاض گیا اور سعودی حکمرانوں سے گفتگو کی۔ اگلے ہی دن واپس آ کر اس نے 22 نومبر کا انتظار نہیں کیا۔
15 نومبر: تمام فیصلوں اور سزاؤں کا اعلان کر دیا گیا۔
فیصلوں کی تفصیل:
پانچ شخصیات کو 15 سال قید کی سزا سنائی گئی، جن میں شیخ علی الجفیری اور شیخ علی المسترشد شامل ہیں۔
باقی شخصیات کی شہریت معطل کی گئی، جن میں آیت اللہ عیسیٰ قاسم شامل ہیں۔ بیرونِ ملک مقیم بہت سے علماء کی فہرست بھی جاری ہو چکی ہے۔
تقریباً 57 علمائے دین کو عمر قید کی سزا سنائی گئی۔ یہ سزائیں ان کے حق میں بھی صادر کی گئیں جو اس وقت ملک میں موجود نہیں تھے۔
امارات کا کردار اور اسرائیلی ایجنڈا
یہ سب کچھ اسرائیل کی پالیسی کا حصہ ہے، کیونکہ اسرائیل اس وقت خلیجی ممالک کے حکمرانوں کو اپنے مقاصد کے لیے مکمل طور پر استعمال کر رہا ہے۔ امارات دوسرا اسرائیل بن چکا ہے اور اسرائیل کی نیابت میں مختلف عرب ممالک میں عسکری گروہ بنائے ہوئے ہے جو وہاں کی داخلی جنگوں میں شریک ہیں:
لیبیا: حفتر کی فورسز کو امارات کے ذریعے اسرائیل کی حمایت حاصل ہے۔
دیگر ممالک: سوڈان، یمن اور ارضِ صومال میں بھی امارات کے اپنے گروہ ہیں۔
ان ممالک میں بظاہر امارات نظر آتا ہے، مگر حقیقت میں اس کے پیچھے موساد ہوتی ہے۔ اس خطے کی پالیسیوں میں خلیجی ممالک کا بہت بڑا کردار ہے۔ اب بحرین کے تعلقات سعودی عرب سے زیادہ امارات کے ساتھ ہو چکے ہیں، کیونکہ امارات اس وقت موساد کا گڑھ بن چکا ہے اور پورے خطے میں اسرائیلی ایجنڈے کو آگے بڑھانے میں مرکزی کردار ادا کر رہا ہے۔
علماء کے خلاف گرفتاریوں اور سزاؤں کے اس پورے سلسلے کا آغاز بھی امارات ہی سے ہوا، جہاں سب سے پہلے علماء کی ایک تعداد کو گرفتار کیا گیا۔ اس کے بعد کویت میں بھی علماء اور اکابرینِ شیعہ کو سزائیں سنائی گئیں، اور وہاں معاملہ حکمِ اعدام تک جا پہنچا، جیسا کہ آیت اللہ شیخ معتوق کے معاملے میں سامنے آیا۔ یہی تسلسل اب بحرین میں نظر آ رہا ہے، جہاں آیت اللہ عیسیٰ قاسم سمیت بڑی تعداد میں علماء اور اکابرینِ شیعہ کو سزائیں سنائی گئی ہیں۔
امارات کے ان اقدامات کا دائرہ علماء تک محدود نہیں رہا۔ وہاں مقیم ہزاروں پاکستانیوں کو بھی بڑے پیمانے پر نکالا گیا۔ ان میں شیعہ بھی تھے اور سنی بھی، مگر جن کے ناموں سے، مثلاً علی، رضا، حسن اور حسین جیسے ناموں سے، شیعہ ہونے کا ذرا سا بھی اشارہ ملتا تھا، انہیں نشانہ بنایا گیا۔ بہت سے پاکستانیوں کو اپنی املاک کا نقصان اٹھانا پڑا اور انہیں بغیر کسی مہلت کے زبردستی وہاں سے جانے پر مجبور کیا گیا۔ یہ تمام اقدامات ایک ہی پالیسی کی مختلف صورتیں ہیں، جس کا ہدف خطے میں شیعہ شناخت اور شیعہ اثر و رسوخ کو کمزور کرنا ہے۔








