وحدت نیوز امور خارجہ:(اصفہان) مجلس وحدت مسلمین شعبہ اصفہان نے حکومت پاکستان کی جانب سے سینیٹر علامہ راجہ ناصر عباس جعفری کے خلاف جاری کردہ وارنٹ گرفتاری پر سخت ردعمل ظاہر کیا ہے۔ تنظیم نے اس اقدام کو “حکومتی بوکھلاہٹ اور انتقامی سیاست” قرار دیتے ہوئے کہا کہ یہ کارروائی پاکستانی عوام کے لیے ناقابل قبول ہے۔
مجلس وحدت مسلمین شعبہ اصفہان کے مطابق، علامہ راجہ ناصر عباس جعفری ملت تشیع اور پاکستان کے تمام مظلوم طبقات کی نمائندہ شخصیت ہیں، جن کی قیادت ہمیشہ امن، اتحاد اور انصاف کے پیغام سے وابستہ رہی ہے۔ شعبہ اصفہان کے مسئولین نے کہا کہ ان کے خلاف یہ کارروائی حکومت کی بدنیتی اور کرپٹ نظام کی ناکام پالیسیوں کو ظاہر کرتی ہے۔
شعبہ اصفہان کے عہدیداران نے زور دے کر کہا کہ ملت جعفریہ ایک پرامن اور قانون کی پابند قوم ہے، لیکن حکومت کی جانب سے مسلط کی گئی ناجائز کارروائیاں اس کے لیے ناقابل برداشت ہیں۔ انہوں نے حکومت کو متنبہ کیا کہ اگر ایسے اقدامات جاری رہے تو اس کے سنگین نتائج برآمد ہوں گے، جن کی ذمہ داری براہ راست حکومت پر عائد ہوگی۔
مجلس وحدت مسلمین شعبہ اصفہان نے مطالبہ کیا کہ علامہ راجہ ناصر عباس جعفری کے خلاف جاری کردہ وارنٹ گرفتاری فوری واپس لیا جائے اور انتقامی سیاست کو ترک کیا جائے۔ تنظیم کے مطابق، پاکستانی قوم ہر ظالم کے خلاف اور ہر مظلوم کے ساتھ کھڑی ہے، اور عوام اپنے حقوق کے تحفظ کے لیے ہر سطح پر آواز بلند کرتے رہیں گے۔
مجلس وحدت مسلمین شعبہ اصفہان کے صدر اور اراکین نے اس معاملے پر اپنی پوزیشن واضح کرتے ہوئے حکومت کو احتیاط برتنے کی ہدایت کی ہے۔ ان کا کہنا تھا کہ اگر حکومت نے اس طرح کے اقدامات جاری رکھے تو اس کے نتائج بھیانک ہوں گے، اور اس کی تمام تر ذمہ داری حکومت پر ہوگی۔
