وحدت نیوز نیٹ ورک (اسلام آباد) : | 28 اکتوبر 2026ء جمعیت علمائے اسلام (ف) کے سربراہ مولانا فضل الرحمٰن نے ایک اعلیٰ سطحی وفد کے ہمراہ سینیٹ میں قائدِ حزبِ اختلاف اور مجلس وحدت مسلمین پاکستان کے چیئرمین سینیٹر علامہ راجہ ناصر عباس جعفری سے سینیٹ میں اپوزیشن چیمبر میں ملاقات کی۔ ملاقات کے دوران ملک کی موجودہ سیاسی صورتِ حال، آئینی و جمہوری امور، اپوزیشن جماعتوں کے مابین باہمی تعاون اور دیگر اہم قومی معاملات پر تفصیلی تبادلۂ خیال کیا گیا۔
ملاقات میں شریک رہنماؤں نے صوبۂ خیبر پختونخوا میں ایمرجنسی کے نفاذ اور گورنر راج کے اقدامات کی شدید مذمت کرتے ہوئے انہیں عوامی حاکمیت اور جمہوری اصولوں کے منافی قرار دیا۔ شرکاء نے پاکستان تحریک انصاف کے رہنماؤں اور کارکنوں کی گرفتاریوں، بالخصوص وزیرِ اعلیٰ، اسپیکر صوبائی اسمبلی، ارکانِ قومی اسمبلی اور دیگر سیاسی رہنماؤں کی گرفتاریوں پر بھی تشویش کا اظہار کیا۔ انہوں نے سیاسی قیدیوں کی فوری رہائی اور سیاسی آزادیوں کے تحفظ کو یقینی بنانے کا مطالبہ کیا۔
آل پارٹیز کانفرنس کے انعقاد پر تفصیلی مشاورت
ملاقات میں آل پارٹیز کانفرنس (اے پی سی) کے انعقاد کے حوالے سے بھی تفصیلی مشاورت کی گئی۔ شرکاء نے پارلیمنٹ میں مولانا فضل الرحمٰن کی جانب سے پیش کردہ اس مؤقف سے اتفاق کیا کہ ملک کو درپیش موجودہ بحرانوں سے نکالنے کے لیے تمام سیاسی جماعتوں کو باہمی مذاکرات اور مشاورت کے ذریعے ایک نئے میثاقِ جمہوریت کی تشکیل کی جانب پیش رفت کرنی چاہیے۔
اس ضمن میں مجوزہ آل پارٹیز کانفرنس کو قومی سیاسی بحران کے حل اور جمہوری عمل کو آگے بڑھانے کے لیے ایک اہم ابتدائی قدم قرار دیا گیا۔
ملاقات میں شریک وفود
پاکستان تحریک انصاف کے وفد میں پارٹی چیئرمین بیرسٹر گوہر علی خان، سابق اسپیکر قومی اسمبلی اسد قیصر، بیرسٹر علی ظفر، عامر محمود ڈوگر، زین قریشی اور آخوندزادہ حسین احمد یوسفزئی شامل تھے۔
جمعیت علمائے اسلام (ف) کی جانب سے سینیٹر کامران مرتضیٰ، میر یونس ظہری اور عثمان بادینی بھی ملاقات میں شریک ہوئے۔
ملاقات میں شریک رہنماؤں نے ملک میں جمہوری اقدار کے تحفظ، آئینی بالادستی اور سیاسی جماعتوں کے مابین مکالمے کے فروغ کے لیے مشترکہ مشاورت کی اہمیت پر زور دیا۔
