سنی اتحاد کونسل پاکستان کے چیئرمین صاحبزادہ حامد رضا نے فیصل آباد میں تنظیم المساجد پاکستان کے عہدیداروں سے گفتگو کرتے ہوئے کہا ہے کہ جنرل راحیل شریف کو فیلڈ مارشل کے عہدے پر ترقی دی جائے، جہاد کے نام پر مسلمانوں کے گلے کاٹنے والے خارجی ہیں، فرقہ واریت امت مسلمہ کیلئے زہر قاتل ہے، عالمی سازش کے تحت تکفیریت اور خارجیت کو فروغ دیا جا رہا ہے۔ انہوں نے کہا کہ پاکستان میں داعش کا وجود فسانہ نہیں حقیقت ہے، ایران سعودی کشیدگی سے اسلام دشمن طاقتوں کو فائدہ پہنچے گا، حکمرانوں کے ایوان گرم اور عوام کے چولہے ٹھنڈے ہو چکے ہیں۔ انہوں نے کہا کہ ملک میں کرپشن کا بازار گرم ہے اور بد عنوانی کے نئے ریکارڈ قائم ہو رہے ہیں، حکمران جنرل راحیل شریف کی مقبولیت سے خوفزدہ ہیں، پاک فوج ملک کے بہتر مستقبل کیلئے قربانیاں دے رہی ہے اور حکمران سو رہے ہیں، حکومت کی ترجیحات میں تعلیم اور صحت شامل نہیں، سال بدل گیا لیکن غریب عوام کی تقدیر نہ بدل سکی۔ صاحبزادہ حامد رضا نے مزید کہا کہ سیاست میں پیسہ بنانے والوں پر سیاست کے دروازے بند ہونے چاہئیں، عوامی مسائل کے حل کے دعویدار حکمران تین برسوں میں گیس اور بجلی کے بحران پر قابو نہیں پا سکے۔ انہوں نے کہا کہ حکومتی غفلت کی وجہ سے داعش پاکستان میں جڑیں پکڑ رہی ہے، اس فتنہ کو پھیلنے سے پہلے ہی کچلا جائے، کراچی آپریشن پر حکومت کسی دباؤ کو خاطر میں نہ لائے، انتہا پسندی کے خاتمے کیلئے ضرب علم کی ضرورت ہے، مسلم ممالک ایران اور سعودی عرب کے سفارتی تعلقات بحال کروائیں، پاکستان ایران سعودی کشیدگی میں فریق کے بجائے ثالث کا کردار ادا کرے۔
