۔ امریکی اخبار لاس اینجلس ٹائمز نے لکھا ہے کہ اگر داعش نے صحرائے سینا میں روسی طیارہ مار گرایا ہو تو شام میں روس کی کارروائیوں میں شدت آجائے گی۔ امریکہ کے اس اخبار نے لکھا ہے کہ حتی اگر داعش نے روسی مسافر طیارہ مار گرایا ہو، تب بھی صدر پوتین شام میں اس گروہ کے خلاف جنگ جاری رکھیں گے۔ اخبار کے مطابق یہ توقع رکھنا کہ صدر پوتین اپنی پالیسیوں پر نظرثانی کریں گے، غلطی ہے کیونکہ صدر پوتین شام میں اپنی فوج کی تقویت کریں گے اور کارروائیوں میں شدت لائیں گے۔ ادھر روس کے صدر نے مصر کی فضا میں روسی مسافر طیاروں کی پرواز ممنوع قرار دے دی ہے۔ روسی صدر کا یہ حکم روس کی قومی سلامتی اور تخریبی اقدامات سے روسی عوام کے تحفظ کے تحت کی جانے والی تدابیر کی روشنی میں جاری ہوا ہے۔ صدر پوتین نے روسی حکومت سے یہ بھی کہا ہے کہ مصر سے روسی شہریوں کی وطن واپسی کا بند وبست کرے۔
ادھر اطلاعات ہیں کہ مصر کے وزیر خارجہ نے مغربی ممالک پر کڑی تنقید کرتے ہوئے کہا ہے کہ مغربی ممالک جزیرہ نما سینا میں گرکر تباہ ہونے والے روسی مسافر طیارے کے بارے میں قاہرہ کو معلومات فراہم نہیں کر رہے ہیں۔ مصری وزیر خارجہ سامح شکری کا کہنا ہے کہ مصری ماہرین کو روسی طیارے کے بارے میں تفصیلات موصول نہیں ہوئی ہیں جبکہ مغربی حکومتیں محض اپنے مفادات کے لئے اس سلسلے میں خبریں نشر کر رہی ہیں۔ سامح شکری نے کہا کہ ہمیں یہ توقع ہے کہ میڈیا میں غلط رپورٹیں شایع کرنے کے بجائے ہمیں تکنیکی معلومات فراہم کی جائیں۔
