اسلام ٹائمز: نو منتخب ڈویژنل صدر سید انصار حسین نے اپنے خطاب میں کہا کہ آئی ایس او ایک ایسی پاکیزہ تنظیم ہے جس نے وطن عزیز پاکستان کی سرزمین پر ولایت کی معرفت و شناخت کرائی اور الہٰی اہداف کے حصول کے لئے بے مثال قربانیاں دی ہیں۔
اسلام ٹائمز۔ امامیہ اسٹوڈنٹس آرگنائزیشن پاکستان بلتستان ڈویژن کے 38ویں سالانہ “ولایت نور ہدایت کنونشن” کے آخری روز مجلس عمومی کا خصوصی اجلاس منعقد ہوا، جس میں اکثریتی رائے سے سابق نائب صدر آئی ایس او بلتستان ڈویژن سید انصار حسین الحسینی کو امامیہ اسٹوڈنٹس آرگنائزیشن بلتستان ڈویژن کا نیا میر کارواں منتخب کیا گیا۔ نو منتخب صدر سے آئی ایس او پاکستان کے مرکزی رہنما احسن نقوی نے حلف لیا۔ ولایت نور ہدایت کنونشن سے خطاب کرتے ہوئے نئے میر کاروان نے کہا کہ آئی ایس او ایک ایسی پاکیزہ تنظیم ہے جس نے وطن عزیز پاکستان کی
سرزمین پر ولایت کی معرفت و شناخت کرائی، الہٰی اہداف کے حصول کے لئے بے مثال قربانیاں دیں اور قربانیوں کا یہ سلسلہ جاری رہے گا، ہم رہبر مسلمین و مستضعفین جہاں آیت اللہ العظمٰی سید علی خامنہ ای کے زیر سرپرستی ظہور امام زمانہ (ع) کے لئے زمینہ سازی کرتے رہیں گے، دنیا بھر کے مظلومین و مستضعفین کی حمایت اور ظالموں کی مخالفت کرتے رہیں گے۔ انہوں نے کہا کہ ہمارا نصب العین تعلیمات قرآن و اہلبیت کو دنیا میں رائج کرنا اور پاکستان کی نظریاتی و جغرافیائی سرحدوں کی حفاظت ہے۔ اس راہ میں آنے والی ہر طرح کی مشکلات کا مقابلہ کرتے رہیں گے۔ سالانہ ڈویژنل کنونش میں ایم ڈبلیو ایم گلگت بلتستان کے ڈپٹی سیکرٹری جنرل علامہ آغا علی رضوی اور شیعہ علماء کونسل بلتستان کے صدر علامہ شیخ فدا حسن عبادی نے خصوصی شرکت کی اور انہوں نے اپنے خطاب میں کہا کہ پاکستان کی سرزمین پر خط ولایت کو زندہ رکھنے اور اقدار اسلام کو احیاء کرنے میں آئی ایس او کی قربانی سب سے بڑھ کر ہے۔
