اسلام ٹائمز: تقریب میں شرکت کرنے والوں میں چیئرمین کل جماعتی حریت کانفرنس میرواعظ عمر فاروق اور سینئر رہنما نعیم خان شامل ہیں جب کہ سینئر کشمیری رہنما سید علی گیلانی نے احتجاجاً اس تقریب کا بائیکاٹ کیا۔اسلام ٹائمز۔ ہندوستان کے دارالحکومت نئی دہلی میں پاکستانی ہائی کمیشن کی عید ملن پارٹی میں آل پارٹیز حریت کانفرنس کے رہنما میرواعظ عمر فاروق سمیت کئی اہم شخصیات نے شرکت کی۔ منگل کو کمیشن میں ہونے والی پارٹی میں پاکستانی ہائی کمشنر عبدالباسط نے
کشمیریوں کی اخلاقی اور سفارتی حمایت جاری رکھنے کے عزم کا اعادہ کرتے ہوئے سری نگر سے خصوصی طور پر نئی دہلی آنے پر میرواعظ عمر فاروق کا شکریہ ادا کیا۔ عمر فاروق نے اس موقع پر پاک انڈیا مذاکراتی عمل کو جاری رکھنے کی ضرورت پر زور دیا۔ پاکستانی ہائی کمشنر نے مہمانوں کو بتایا کہ وزیراعظم نوازشریف دونوں ممالک میں امن کے خواہاں ہیں۔ ’ہم چاہتے ہیں پاکستان اور انڈیا کے درمیان تمام اہم معاملات پر بات چیت ہو۔ امید ہے دونوں ملکوں کے قائدین جلد ملاقات کرتے ہوئے باہمی مسائل حل کریں گے‘۔
خیال رہے کہ پارٹی میں حریت کانفرنس کے رہنما سید علی گیلانی احتجاجاً شریک نہیں ہوئے۔ انہوں نے روسی شہر اوفا میں پاک انڈیا وزرائے اعظم کے درمیان ملاقات میں مسئلہ کشمیر کو مذاکرات کا حصہ نہ بنائے جانے پر عید ملن پارٹی کے بائیکاٹ کا اعلان کیا تھا۔
