مجلس وحدت مسلمین پاکستان کے مرکزی معاون سیکرٹری سیاسیات علامہ مقصود علی ڈومکی نے ضلع خیر پور میرس کا دورہ کیا، اس موقعہ پر انہوں نے کنب سٹی اور پیر وسان میں منعقدہ مجالس عزا اور عوامی اجتماعات سے خطاب کیا، انہوں نے پیر وسان پریس کلب میں ضلعی سیکرٹری جنرل منور علی ساجدی کے ہمراہ پریس کانفرنس سے خطاب کرتے ہوئے کہا کہ مجلس وحدت مسلمین آئندہ بلدیاتی الیکشن میں بھرپور حصہ لیگی، بلدیاتی الیکشن کے سلسلے میں 30 مئی کو حیدر آباد اور 31 مئی کو کراچی اور سکھر میں مشاورتی اجلاس منعقد کیے جارہے ہیں، جن میں MWM کے تنظیمی ذمہ داران کے علاوہ علماء کرام اور مختلف شخصیات شریک ہونگی۔ انہوں نے کہا کہ نظام ولایت کے ماننے والے طاغوتی نظاموں کو چھوڑ کر نظام ولایت فقیہ کے محور پر جمع ہوجائیں، پاکستان میں بسنے والے پانچ کروڑ شیعہ، پاک وطن کی سربلندی اور سالمیت کے لئے اپنا بھرپور کردار ادا کرینگے اور پاک وطن کو دہشت گردی اور مسائل سے نکالنے میں اپنا مثبت کردار ادا کریں گے۔ یوم مردہ باد امریکہ و اسرائیل کے موقع پر انہوں نے کہا کہ اسرائیل کا وجود عالم انسانیت کے لئے خطرہ ہے، عالمی سامراج امریکہ اور بوڑھے استعمار برطانیہ نے اسرائیلی جرائم کی سر پرستی کرکے سنگین جرم کا ارتکاب کیا ہے، دنیا بھر کے حریت پسند عوام جلد ہی سر زمین فلسطین اور قبلہ اول بیت المقدس کی اسرائیلی غاصبانہ قبضے سے آزادی اپنی آنکھوں سے دیکھیں گے۔
خبر کا کوڈ: 461435
