متحدہ قومی موومنٹ کے سربراہ الطاف حسین کی تقریر کے بعد پیمرا نے نیوز چینلز کے لیے نئی ہدایات جاری کردیں ہیں، جس کے تحت ملک کی سلامتی اور وقار کے منافی پروگراموں پر پابندی عائد کردی گئی ہے۔ پیمرا کی جانب سے سیکشن 27 کے تحت ٹی وی چینلز کے لیے جاری ہدایت نامہ میں کہا گیا ہے کہ ملکی سلامتی کے خلاف نفرت یا شرانگیز نشریات پیش نہیں کی جاسکتیں اور نہ ہی ملک کے خلاف شرانگیز تقریر یا انٹرویو نشر کیا جائے گا۔ پیمرا کے ترجمان کی جانب سے جاری ہونے والے ایک بیان میں کہا گیا ہے کہ عدلیہ، افواج پاکستان اور دیگر سکیورٹی اداروں کے خلاف نشریات ممنوع ہیں۔ ملکی سلامتی کے خلاف نشریات پیش نہیں کی جاسکتیں۔ اس سے قبل وزارت اطلاعات کی جانب سے پیمرا کے قائم مقام چیئرمین کو ایک خط لکھا گیا، جس میں کہا گیا کہ ٹی وی چینلز نے الطاف حسین کی وہ تقریر براہ راست نشر کی، جس میں انہوں نے لوگوں کو نفرت پر اکسایا۔ حکومت نے خط میں ٹی وی چینلز کے خلاف پیمرا رولز کی دفعہ 27 کے تحت کاروائی کا مطالبہ کیا تھا۔
