فلسطین اور قدس شریف کے مفتی اعظم اور خطیب مسجد الاقصی شیخ محمد احمد حسین نے لندن سے شایع ہونے والے اخبار الشرق الاوسط سے گفتگو میں کہا ہے کہ جو لوگ دین خدا کے نفاذ کے بہانے جنگ کرتے ہیں وہ علم دین سے بے بہرہ ہیں
اور انہیں دین کے بارے میں کچھ بھی نہیں معلوم ہے- مفتی فلسطین نے کہا کہ جن اقدامات کے داعش اور دیگر گمراہ تکفیری گروہ مرتکب ہورہے ہیں وہ خوارج کی یاد دلاتے ہیں- شیخ حسین نے کہا کہ تکفیری دہشتگرد گروہوں کو صرف تخریبی اقدامات، رعب و وحشت پھیلانے اور مومنین کا قتل عام کرنے کی ٹریننگ دی گئی ہے- انہوں نے کہا کہ حکومت حاصل کرنے کےلئے تکفیری گروہ یہ اقدامات کرتے ہیں- قدس شریف کے مفتی نے کہا کہ مسلمانوں کو آپس میں تعلیمات قرآن کریم اور سنت پیغمبر اکرم صلی اللہ علیہ وآلہ وسلم کی اساس پر جو عدل انصاف اور نیکی سے عبارت ہے زندگی گذارنا چاہیے- انہوں نے کہا کہ دین اسلام نے بے گناہ انسانوں کا خون بہانے کی ممانعت کی ہے- شیخ حسین نے کہا کہ لوگوں کے درمیان اختلاف ایک فطری امر ہے اور مسلمانوں کے درمیان اشتراکات، اختلافات سے زیادہ ہیں کیونکہ ان کا خدا ایک ہے، پیغمبر ایک ہیں اور ان کا انجام بھی ایک ہی ہے- شیخ حسین نے کہا کہ اختلافات حل کرنے کے لئے مسلمانوں کو ایک دوسرے اور غیر مسلم قوموں کے ساتھ اچھا سلوک کرنا چاہیے اور انسانوں کے برابر ہونے کے اصول پر عمل پیرا ہونا چاہیے-
