ایکسپریس نیوز کے مطابق کوئٹہ کی انسداد دہشتگردی عدالت میں نواب اکبر بگٹی قتل کیس کی سماعت ہوئی اس موقع پر پاکستان کے سابق صدر پرویز مشرف کے وکیل نے پرویز مشرف کی طبیعت کی ناسازی کا عزر پیش کر کے انہیں حاضری سے مستثنیٰ قرار دیئے جانے کی درخواست کی جس پر عدالت نے میڈیکل بورڈ کی عدم تشکیل پر شدید برہمی کا اظہار کیا۔
جب کہ مدعی جمیل اکبر بگٹی کے وکیل نے عدالت کو بتایا کہ ہم نے مختلف ٹی وی چینلز پر دیکھا ہے کہ پرویز مشرف انٹرویو دیتے ہیں لیکن عدالت کے سامنے پیش نہیں ہوتے۔ عدالت نے وکلا کے دلائل سننے کے بعد سابق صدر پرویز مشرف،سابق وفاقی وزیرداخلہ آفتاب احمد خان شیرپاؤ اور صوبائی وزیرداخلہ شعیب نوشیروانی پر فرد جرم عائد کرتے ہوئے سماعت 4 فروری تک ملتوی کردی۔ واضح رہے کہ نواب اکبر بگٹی کے صاحبزادے جمیل اکبر بگٹی کی جانب سے 2009 میں والد کے قتل کا مقدمہ درج کرایا گیا تھا جس میں سابق صدر پرویز مشرف، سابق وفاقی وزیرداخلہ آفتاب احمد خان شیرپاؤ، صوبائی وزیرداخلہ شعیب نوشیروانی اور اس وقت کے گورنر اویس غنی کو نامزد کیا تھا۔
