وحدت نیوز (قم) جذابہ بارڈر پر پاکستانی زائرین کو درپیش مشکلات کے حوالے سے مجلس وحدت مسلمین پاکستان شعبہ امور خارجہ کے مسئول حجۃ الاسلام ڈاکٹر شفقت شیرازی کا عراقی اعلی حکام سے رابطہ اور عراقی حکام کی طرف سے مسئلے کے حل کی یقین دہانی۔ تفصیلات کے مطابق جذابہ بارڈر پر عراقی عملے کی طرف سے پاکستانی زائرین کو پاسپورٹ واپس لینے کے حوالے سے سخت مشکلات کا سامنا تھا۔ اس موقع پر مجلس وحدت مسلمین پاکستان شعبہ امور خارجہ کے مسئول حجۃ الاسلام ڈاکٹر شفقت حسین شیرازی نے پاکستان میں عراقی سفیر سمیت متعدد عراقی اعلی حکام سے رابطہ کر کے انہیں درپیش صورتحال سے آگاہ کیا۔ عراقی حکام نے اطلاع ملتے ہی مثبت ردعمل کا اظہار کرتے ہوئے فوری طور پر تعاون کرنے کی یقین دہانی کرائی۔ مجلس وحدت مسلمین شعبہ امور خارجہ کے میڈیا سیل کے مطابق عراقی امیگریشن کے اہلکاروں نے پاسپورٹس کی جمع آوری کے وقت کسی خاص ترتیب کا خیال نہیں رکھا جس کی وجہ سے پاسپورٹوں کی واپسی میں مشکل پیش آئی اور سخت گرمی سے زائرین کو شدید تکلیف کا سامنا کرنا پڑا۔ اس خبر کے وائرل ہوتے ہی حجۃ الاسلام ڈاکٹر شفقت حسین شیرازی نے از خود عراقی حکام سے رابطہ کر کے صورتحال سے انہیں آگاہ کیا اور مسئلے کے حل کیلئے فوری قدم اٹھانے کی اپیل کی جس پر عراقی حکام نے زائرین کے مسئلے کو حل کرنے کی یقین دہانی کرائی۔
انہوں نے اس کے علاوہ نجف اشرف اور بغداد ائرپورٹ پر پریشان زائرین اور انکے پاسپورٹس اور آئیر لائنز اور سیاحتی کمپنیوں کی کوتاہیوں کی وجہ سے وطن واپسی کے وقت زائرین کو پیش آنے والی مشکلات اور پریشانیوں سے بھی عراقی حکام کو آگاہ کیا۔
