وحدت نیوز نیٹ ورک ( قم): مجلس وحدت مسلمین شعبہ قم کے دفتر میں پاکستان کے معروف دینی ادارے جامعۃ الولایہ کے مدیر، خطیب اور استادِ گرامی حجت الاسلام و المسلمین سید علی محمد نقوی سے ایک اہم اور پر برکت ملاقات ہوئی۔
جمعے کے دن منعقد ہونے والی خصوصی نشست میں مجلس وحدت مسلمین شعبہ قم کی مکمل کابینہ نے شرکت کی۔ تقریب کا آغاز تلاوت کلام پاک سے ہوا، جس کے بعد شعبہ قم کے صدر حجت الاسلام سید ذیشان حیدر الحسنی نے مہمانِ گرامی کا پرتپاک استقبال کیا اور کابینہ کے اراکین سے تعارف کرایا۔
انہوں نے مہمان کو شعبہ قم کی تعلیمی، فکری اور تنظیمی سرگرمیوں سے آگاہ کیا، جس پر حجت الاسلام سید علی محمد نقوی نے شعبہ کی کوششوں، نظم و ضبط اور فعال کردار کو سراہتے ہوئے قابلِ تحسین قرار دیا۔
اس کے بعد معروف اساتذہ میں شمار ہونے والے حجت الاسلام سید علی شاہ نقوی نے خطاب کرتے ہوئے حوزہ علمیہ قم میں زیر تعلیم طلبہ کو علم و تقویٰ سے آراستہ ہونے کی اہمیت پر زور دیا۔ انہوں نے کہا کہ حوزوی طلبہ کی ذمہ داری ہے کہ وہ اپنی علمی و اخلاقی تربیت کے ساتھ ساتھ معاشرتی اصلاح اور اجتماعی امور کو بھی اپنی ترجیحات میں شامل کریں۔
انہوں نے خصوصی تاکید کی کہ قم میں موجود طلبہ کو مجلس وحدت مسلمین پاکستان کے لیے مؤثر اور باصلاحیت افراد کے طور پر تیار کیا جائے اور عوامی رابطوں کو مزید مضبوط بنایا جائے۔
نشست میں تمام شرکاء نے پاکستان اور امت مسلمہ کے مسائل پر تبادلہ خیال کیا اور مشترکہ تعاون کے ذریعے دینی و ملی خدمات کو مزید مؤثر بنانے پر اتفاق کیا۔
